 |
| الحب |
حُبي لم يكُن عابرًا | الكاتبة ضحى كارم
اسكربت
إحنا نفوسنا غالية و مينفعش تتهان ...."
-نهارك اسود يا ضحى
- سودتيه ليه حرام عليكي عملت ايه ؟؟!َ!
-ايه اللي اسماء كاتبهولك ده ؟؟!
- احم ... ازيك يا قلبي
صرخت – واسماء تقولك قلبي ليه ها ؟؟! صحاب انتو وانا معرفش
-طب اهدي يا حفصة ما انتي عارفة انك انتي اللي في القلب
انا عارفة ان حفصة بتغير،حفصة بتغير لما بتلاقيني عرفت حد ، بتغير لما بتشوفني ضحكت مع واحدة مثلا ، حفصة بتخاف علشان محدش ياخد مكانها بس اللي هي متعرفوش ان عمر ما حد يقدر يوصل لمكانتها ممكن الابتسامة البسيطة تكون كرد مش اكتر لكن الابتسامة اللي هي بترسمها في وقت حزني دي بالدنيا وما فيها
-ومقولتليش ليه ان اسماء كتبتلك كده
-هقولك علشان تتضايقي يعني انا رديت عليها ولا كأنها قالت حاجة خلاص بقى
ردت بهدوء –ضحى انا ايه بالنسبالك ؟؟!
ضحكت اصل سؤالها غريب هي الوحيدة اللي مينفعش تسأل السؤال ده لأن هي دنيتي التانية الدنيا اللي مفيهاش شر ولا حقد ولا أذى ،الصبح سماها صافية وشمسها اللي بتطلع وبتعلن ان يوم جديد طلع مليان بحب اكتر من اليوم اللي قبله وبليل نجومها جميلة وقمرها منور، دنيا خاصة بينا احنا لغتها عيوننا، احنا مش محتاجين نتكلم علشان نفهم بعض انا من نظرة بعرف هي عايزة تقول ايه
-عمة عيالي يا حفصة
برقت لي وضحكت واخيرا قد جرت الامور كما خطت لها
-ده اللي هو زين مش كده
-بالظبط وتبقي عمتو الحرباية
صرخت- عايزة تتجوزي اخويا علشان ابقى عمتوالحرباية يا ضحى
-اهدي يا روحي انتي كده كده هتكوني عمتو الحرباية معايا او لا قدر الله لاقدر الله بعد الشر يعني مع غيري
ضحكت –ضحى انتي غيرتي الموضوع
-مش انتي سألتيني وانا جاوبتك يبقى خلاص
-ماشي يا ضحى
-فكي بقى كده ده انا هجيب المأذون واجيلكم
ضحكت- ليه شايفالي عريس ؟؟!
-لأ شايفة لاخوكي عروسة
ساعات بقعد افكر ايه اللي هيحصل لو بقى العكس لو البنت هي اللي راحت اتقدمت للولد على الاقل لو هي كلمته مش هتقوله اسفة مش هقدر اتجوز واحد صاحبني قبل الجواز او مش انت الاب اللي هيعرف يربي ولادي مش هعشمه بالجواز واسيبه واكسر قلبه
-يلا اخوكي جه سلام بقى
-ازيك ياضحى
-الحمد لله انت عامل ايه
-بخير
-طول مانا في حياتك اكيد هتبقى بخير يعني
ضحكنا كلنا
-يلا سلام
-رايحة فين ؟؟!!
-هروح
-طب استني نوصلك معانا
ابتسمت- خايف عليا اروح لوحدي يعني متقلقش الوقت متاخرش لسة
-مش قصدي
قاطعته- مش قصدك تحرجني ..عارفة يازين متخافش
اخد نفس – يارب
-يخليني ليك
-نعم ؟؟؟!!!
- بتنسى دايما تكمل الجمل فبكملهالك يعني فين المشكلة
سبته ومشيت وهو كالعادة مصدوم فين المشكلة في اني اساعد زوجي قرة عيني يعني ايه الفرق بيني وبينه ده حتى ملامحك كلها مني يادوب الاسم متغير يعني مش حوار !!!!!!!!!!
-نعم هتخطب ؟!
-مالك مستغربة ليه ؟!
-طب وضحى ؟؟!
-هي اللي عشمت نفسها بأمل كداب وحاجة مش ليها
-بس ضحى بتحبك يا زين
-وانا كذا مرة قولتلها انا مش بشوفك غير اختي وبس
-زين حاول تفكر تاني ارجوك
-هاتي عنوان العيادة بتاعتها
- ليه اسنانك واجعاك ولا حاجة
-انا مش بهرج يا حفصة هاتي عنوان العيادة
-اتفضل
-لو سمحت عايز اقابل الدكتورة ضحى
-كشف ؟؟!
-لأ قولها زين
-طيب ياريت حضرتك تنتظر لحد ما تخلص الكشف اللي معاها وهبلغها
-تمام شكرا
-بس هي عيونها حلوة جدا
-اها فعلا
زين قاطعهم – مين دي ؟؟!
-الدكتورة ضحى
زعق – وانت بقى جاي علشان تتفرج على عيونها
-استاذ زين اتفضل تقدر تدخل
زين دخل وكان باين عليه متعصب
-ضحى ياريت نتكلم لوحدنا
-طب اتفضلي انتي يا سلمى دلوقتي
طلعت وقعد
-ايه اللي سمعته ده يا ضحى
-سمعت ايه ؟؟!
زعق- الاستاذ الفاضل برة كان بيقول قد ايه عنيكي حلوة والتاني بيوافقه
ملفتش نظري غير حاجة واحدة بس في الجملة
-زين انت بتغير ؟؟!!!!!!
-انا ؟؟!لأ طبعا
قاطعته- زين قول متتكسفش انا خلاص اختارت كل حاجة مفيش غير اسماء ولادنا نسمي ايه ؟؟!
-ضحى ..
قاطعته – ياااااه يا زين للدرجادي بتحبني عايز تسمي بنتنا على اسمي انا لو لفيت فعلا الدنيا كلها مش هلاقي زيك
-ضحى افهمي بقى انا لابحبك ولا حاجة انتي ...انتي واحدة تافهة
عيوني دمعت- بس انا مش تافهة يا زين وعمري ما عملت حاجة وندمت عليها غير اني حبيتك واني وهبت مشاعري لشخص ميستحقهاش
مسحت دموعي ورجعت نبرة القوة في صوتي
-انا كنت رايحة جاية اغني بحبك عارف ليه علشان مش جبانة زيك يا زين انت خايف تبين مشاعرك علشان فاكر ان ده ضعف بس اللي انا فيه ده اقوى مراحل القوة واللي انت فيه قمة الضعف انا كنت ماسكة فيك علشان مش ضحى اللي اتعودت تسيب حقها علشان ضحى قوية مش تافهة لو الضحكة اللي برسمها علشان اداري حزني ومخليش حد يحس بيا دي تفاهة لوشوفت حد متضايق وفضلت وراه لحد ما اخليه يضحك ده تفاهة لو جبر الخاطر وكل دول بالنسبالك تفاهة فانا فخورة اني تافهة
سكت ومشي ومردش لأول مرة اقرر اهرب ، اهرب من المواجهة ومن كل شئ ، بس انا اللي غلطانة انا اللي عودته ان حبي ليه اصبح شئ معتاد كان لازم يتعب علشان يوصلي كان لازم اسقيه من الوجع اللي شوفته مرتين علشان بس اقوله بحبك غلطانة علشان فرضت نفسي ومشاعري احنا نفوسنا غالية ومينفعش تتهان
جريت عليه وانا بعيط
اتخض- ضحى مالك فيه ايه ؟!
-انا محتاجة لحضنك اوي
حضني وانا مسكت فيه بكل قوتي
-وحضني ملكك انتي وبس وقت ما تحتاجيه هتلاقيه دايما يا ضحى
عيطت- جدو انا مش تافهة انا فيا وجع يهد جبال ، جدو انا مش تافهة صح ؟؟!
-ومين قال انك تافهة البنت اللي قدرت تحقق حلمها اللي بتحلم بيه من طفولتها مش تافهة البنت اللي بقت مشهورة انها من احسن الناس في شغلها عمرها ما تكون تافهة البنت اللي بتكون سند لأهلها زلاصحابها مينفعش تكون تافهة والاهم ان حفيدتي عمرها ما تكون تافهة
اخدت اجازة من الشغل ومن البيت ومن كل حاجة وقعدت مع جدو ،قعدت مع ضحى حاولت اسعدها نفسي هي الوحيدة اللي لازم افكر اني اسعدها قبل كل شئ ، بس هو حقي وضحى عمرها ما تتنازل عن حقها ....!!!
عرفت من حفصة انه ندمان كان بيدور عليا في كل مكان مش لاقيني اصريت على حفصة انها متقولش انا فين خليه يعيد حساباته وخليه يقّدر قيمتي بجد
-جدو فين زين
-زين مين ؟؟!
غمزتله- زين القط يا جدو ،دماغك متروحش بعيد
-وتفتكري انه يستاهل ان ضحكتك تغيب عننا ده كله
ابتسمت – ولا أي شئ يقدر يخلي ضحكتي تغيب عنكم يا جدو
-ضحى انتي مش بس حفيدتي لأ ده انتي بنتي
-وانا بحبك اوي يا جدو
فتحت الفون لقيت مسدج من رقم غريب فيها قصيدة ايوة بغير لهشام الجخ وتحت كتب اسمه زين ، كنت عارفة ان هو من قبل ما يكتب اسمه قلبي عمره ما كدب عليا وبالذات لو حاجة عنه
-جدو مشوفتش زين
غمزلي- زين القط
ضحكت- اه
-تقريبا طلع يجري كده
طلعت اجري وراه على السلم ونزلت لحد باب العمارة تحت
-زين يا زين
-بتنادي عليا
شوفته جاي مبتسم ومعاه ورد ،اكيد خيال اكيد جاي ضيف في احلامي كالعادة اكيد بتخيل زي كل يوم وانه قدامي وبشكيله منه ليه ، بس للأسف المرة دي طلعت حقيقة
-ضحى ارجوكي اسمعيني
-وانت ليه مهتم ان واحدة تافهة زيي تسمعك
تجاهل جملتي
-ضحى ما انتي مينفعش برضو تسمي القط على اسمي
كتمت ضحكتي بالعافية
-ده شئ ميخصكش
اتنهد- ايوة يا ضحى بغير .. بغير عليكي من عيون الناس ،بغير لو حد اتكلم عليكي بشئ مكنتش اعرف اني بحبك اوي كده كنت بحاول اقنع نفسي قبلك انك اختي ،كنت شايف ان الحب ده ضعف
ده ايه يارب العيلة اللي كلها بتغير دي هو واخته حرام بجد ،بس مش مشكلة عادي على قلبي زي العسل
كمل- ضحى انتي مش تافهة انا فعلا اللي جبان انا يمكن فيا عيوب ويمكن بعضها لا تطاق بس
قاطعته- بس في ناس بتشوف عيوبك مميزات وأنا منهم...!!
...................................
وحبي لم يكن عابرا ولم اكن شخصا وانتهى واعلم ان حبي لك زاد حد المنتهى 💜💜!!
تعليقات