ليالي الشتاء | الكاتبة نانسي رمضان

ليالي الشتاء

ليالي الشتاء | نانسي رمضان

برد الشتا طل 
وطل بذكرياته وأيامه،كل الذكريات ،بينا بتنعاد قدامي بس وأنت مش موجود 
أول مرة اتقابلنا كان في الشتا
أول مرة اعترفت لي بحبك كان في الشتا،يوم وداعنا كان في الشتا، كأن كان مكتوب أي حاجة تحصل بينا تكون فيه 
وفي الآخر مش عايزني أخاف من برد الشتاء ولياليه
اه من ليالي الشتا وذكرياته وتفاصيله ،حاسة إن قلبي مقبوض و بخوف ممكن علشان بعدنا ،ومبقتش جنبي ،حاسة أن في حاجة نقصاني ،سعادتي مش مكتملة،مش متخيلة إن هيجي اليوم اللي أخاف فيه من الشتا ومطره
فاكر لما قولتلك الشتا شبهك علشان كل ما بيجي ، بيجيب معاه الفرح والسعد والخير علي قلوب الناس  وبنزعل أوي لما بيخلص بنحس أن حد عزيز فارقنا وسافر ومش هيجي غير بعد سنة ،زيك كدة أول ما جيت  ،جبت معاك السعادة لقلبي وكنت حاسة أني طايرة مش علي الأرض بس الشتا بيجي كل سنة  بس أنت مش معايا السنة ديه ،غيابك طال  وهيطول ما إحنا افترقنا وأدينا عايشين
هيفيد بأيه العتاب والكلام 
وحشتني قعدتنا علي الكورنيش بليل ونشغل أغاني فيروز
هو الشتا بيكمل غير بصوت   سفيرة الأحلام، صوتها بيحسنني دايما بالبحر  وبيك ،علشان كدة كل ما بتوحشني بسمعها وأدوب وأسرح بخيالي فيك يا تري لو بعت الكلام ده ليك هينفع نرجع  هنرجع في الشتا زي ما افترقنا فيه ؟ولا الغياب نساك
رسالة منك بتقولي نرجع.
خايفة نرجع ونفترق تاني وأحس ببرد الشتا علي قلبي تاني 
عايزني اسمحك، أنا مسمحاك 
بس مش هينفع نرجع كفاية ليالي الشتا عليا، خلينا كدة كل واحد مننا فاكر إن التاني نسي وأحنا منسناش،بس متأكدة إن في يوم من الأيام هيجي الشتا ومش هحسه ببرودته ،وهنسي اللي ما بينا كأنه مجمعناش ولا فرقنا 
بس أنا مسمحاك