 |
| أ. محمد فوزي |
بوست فيه خلاصة ٣ سنين مرمطة
خلصت ثانوية بمجموع ٧٢% وبقيت فاشل رسمي 👌😂
مكنتش مقتنع بالتعليم عموما كنت بحب السوق والشغل والمرمطة .. فبدات اقرا عن كل حاجة وحبيت الماركتينج جدا وبدات شغل فيه ونجحت فيه ومسكت فلوس مكنتش اتخيل امسكها وانا طالب .. بس اللي كسبته كان اكبر من فلوس اللي كسبته خبرة من شغل ومرمطة كنت حاببها ومن ناس عظيمة فضلهم عليا كبير جدا .. ف تعالوا ندردش كدا ونقول اهم الحاجات اللي اتعلمتها
- اكتر حاجة صعبة هتقابلها وانت ف الجامعة ازاي توفق بين كليتك وشغلك وازاي تنجح ف الاتنين بالتوازي .. لو عملت دا اعرف انك تنين مجنح
- اللي بتدرسه ف الكلية حاجة واللي هتلاقيه ف السوق حاجة تاني خالص .. فاشتغل وانت طالب عشان متندمش بعدين
- حاول علي قد ما تقدر تكون شبكة علاقات قوية لان دا هيوفر عليك وقت كبير ويسهلك الوصول لاماكن مهمة بسرعة بس الاهم من دا خبرتك لانك لو معندكش خبرة مش هتكمل وهتكون بالونة مع اول شكة دبوس هتفرقع
- لازم تنزل نشاط طلابي وانت ف الجامعة .. لازم
- اقرا عن الحرية المالية وازاي تكون ثروة .. ابدا بكتاب اغني راجل في بابل
- اتعلم مهارة واحدة بس تضمنلك دخل مادي كويس وركز عليها كل مجهودك وبعدها ابدا اتعلم مهارة جديدة
- متديش كل اهتمامك للكلية .. هتندم بعدين وهيكون الوقت فات
- الانجلش مبقاش اختياري .. مش هتعرف تشتغل من غيره .. افتح يوتيوب واكتب ذا امريكن انجلش
- الصحاب مش بكترهم .. خلي دايرة معارفك كتير .. خلي دايرة صحاب قليلة ومحدودة ومش اي حد يقول انه صاحبك
- وبالنسبة للصحاب .. هتيجي عليك فترة هتعرف ناس وتلاقي نفسك بتنقي الكلام قبل ما تقوله وبتختار لبس معين لما تقابلهم وبتبقي مش علي حريتك وانت معاهم .. اهرب من الناس دي خليك وسط اللي شبهك .. انت جميل وانت علي طبيعتك صدقني
- لو فاكر ان كل صحابك هيفرحوا بنجاحك تبقي عبيط .. هتعرف بعدين ان كلمة صاحب دي كلمة كبيرة جدا مينفعش تقولها لاي حد والسلام
- مش هتلاقي حد يفرحلك قد اهلك ..
- اهتم باهلك وصحتك لان دول اللي مكملين معاك باقي المشوار
- اعمل جدول يومي فيه الحاجات اللي مطلوبة منك وبما انك ماسك الفون ٢٤ ساعة نزل اي ابلكيشن لل to do list
- لو شغال فري لانسر زي حالاتي حدد ساعات معينة للشغل عشان لو سبتها مفتوحة هتلاقي نفسك شغال اليوم كله وبعد ايام طاقتك كلها خلصت
- اتعود كل فترة تتكلم مع ناس اكبر منك سنا وليهم تجارب كتير .. صدقني هتعرف حاجات هتوفر عليك وقت وتعب كتير
- بلاش تبقي مغفل وتتكلم عن كل حاجة تخصك قدام كل الناس
- امورك المادية والعائلية خط احمر محدش المفروض يبقي عارف عنها حاجة
- علي قد ما هتغلط علي قد ما هتتعلم .. اغلط كتير واستغل فترة الجامعة في دا وعشان تغلط وانت ف الجامعة لازم تشتغل ها
- اكتر عملاء بيطلبوا تعديلات وبيكرهوك ف الشغل بسبب ارائهم واقتراحاتهم هتعرف بعدين انهم كانوا اكبر سبب انك تتطور بسرعة بطريقة غير مباشرة
- بلاش تبقي مصلح اجتماعي وتقعد تشوف عيوب الناس وتعدل فيهم .. غير نفسك انت الاول ولو لحقت بص لغيرك
- ابعد عن التسويق الشبكي
- الركن الديني في حياتك عامل كدا زي واحد عمال يجري ف الصحرا من غير مياة .. الدين في حياتنا هي المياة اللي بتخلينا نقدر نكمل وسط كل اللي بنشوفه
- متخليش يومك يعدي من غير : الصلاة ف مواعيدها - الاذكار - الاستغفار
- القران والصلاة حل لكل مشاكلة النفسية
- اي حد يطلب منك مساعدة متتاخرش عليه .. وفي نفس الوقت متجيش علي نفسك عشان حد
- اتعلم ازاي تعمل CV بشكل بروفشنال
- اقرأ عن المنح وطرق التقديم فيها
- لازم وانت خارج من الكلية يكون معاك لغة او برمجة
لازم ؟ .. اه لازم
- كل واحد بينجح بطريقته وشخصيته .. بلاش تقلد حد شوف انت بتحب ايه وطور نفسك فيه
- اوعي تتغر في اي حد ناجح علي السوشيال ميديا تبقي غلطان .. اي حد علي السوشيال ميديا فشل كتير جدا لكن مش هتلاقيه بيظهر الجانب دا اوي .. هتلاقيه بيتكلم عن نجاحه ف الاغلب .. ف الناس دي زيها زيك فاشلين بس بيحاولوا وعشان كدا وصلوا .. فانت كمان حاول حتي لو هتفشل
- عيش فترة الجامعة اخرج وسافر واتبسط واعمل كل اللي يبسطك ف السن دا .. بعد ما هتبدأ شغل مش هتلاقي وقت للفسح غير كل فين وفين .. اتبسط وعيش سنك اللي جاي بعدين مش لطيف
- فكك من جو الشهادات المعتمدة والبلح دا .. وظيفة اي كورس انه يعلمك مهارة او حاجة معينة فقبل ما تبدأ اي كورس اسال نفسك هل الكورس هيأهلني فعلا ل دا ولا لا ؟
- الكورس الفلاني فري فكدا مالوش لازمة .. مفيش حاجة اسمها كدا لما تلاقي الكورس فري اسال عن المكان والمدرب وبناء عليه هتعرف علي الكورس دا فاكس ولا لا
- في حاجة مشتركة ما بين كل الجروبات الكبيرة للطلبة او الناس اللي بتحاول تطور من نفسها .. وهي انك تلاقي كل يوم شخص منزله انه خلص 100 كورس .. بس لو بصيت كويس هتلاقي كل كورس ف مجال غير التاني اصلا
صدقني هو مش بكترهم .. خلص كورس واحد بس استخدمه صح واستفيد منه
- قبل ما تسأل اي شخص علي اي معلومة مهما كانت هي ايه .. روح اكتب السؤال علي جوجل ويوتيوب ولو ملقتش الاجابة روح اسال الشخص ودا مش هيحصل
- البس اللي يعجبك وكل اللي يعجبك وطظ ف الناس
- سافر حتي لو هتسافر مرة واحد في السنة بس لازم تسافر وتشوف حاجة جديدة وناس تانية .. صدقني هترجع شخص تاني
- كدا كدا انت هتتسحل وهتشتغل وهيطلع عينك بعد الجامعة .. وفر كل التعب دا واشتغل وانت ف الجامعة واتخرج وانت ملك وضامن وظيفة معينة
- اشتغل من وانت ف الجامعة
- قبل ما تاخد اي قرار مهم استني لتاني يوم هتلاقي نفسك غيرت رايك .. ودا بسبب ان اغلب قراراتنا بتبقي بناء علي مشاعرنا الحالية واللي بنرجع نندم عليها بعدين
- اسمع للكل الصغير قبل الكبير بس في الاخر نفذ اللي انت شايفه صح حتي لو هتغلط وايه يعني يبقي علي الاقل اتعلمت حاجة جديدة
- اتعلم ازاي تتعود تبقي لوحدك وتقضي اغلب اليوم وحدك وهتعرف ليه بعدين
- لما تغلط قول انك غلطت واعترف بدا صدقني الناس هتحترمك جدا وانت هتحترم نفسك وهتتعلم من غلطك .. اوعي تكابر
- مش شرط خالص انك تنجح علي فكرة اهم حاجة انك بتحاول
- القراية بقت عاملة زي اللغة مبقتش رفاهية .. انت لازم تقرا
- اتعلم تسمع اكتر ما تتكلم .. احنا شعب بيحب الكلام عن نفسه اوي وهتتعب اوي لحد ما تتعلم تسكت عشان تقدر تسمع
- الناس بتحب اللي يسمعها جرب تسمعهم هيحبوك جرب تتكلم وتقاطع هيكرهوك
ومن هنا اقرا شوية عن السيلز واتعلمه حتي لو مش هتشتغل بيه
- اقعد مع نفسك يوم وابعد عن كل حاجة وشوف حاجة انت بتحبها وهتوفرلك دخل مادي كويس وابدا طور نفسك فيها
- شوف المجال اللي انت حابه وتابع الناس الناجحة فيه وشوف بيقولوا ايه .. غالبا هتوفر علي نفسك نص الطريق
- حاول يكون ليك شخص منتور في حياتك .. بحيث ترجعله في اي قرار مهم ف حياتك او مجالك
- واخيرا لازم تشتغل وانت في الجامعة
ومدام وصلت لهنا عرفنا ايه اكتر حاجة عجبتك او استفدت منها وناوي تبدأ بيها ي بطل 🔥
وكالعادة دمتم ودمنا عظماء 🔥❤️😁
منقول :أ. محمد فوزي
تعليقات