" آن للروح أن تسكُن " بقلم الكاتبة آلاء مصطفى
 |
| آن للروح أن تسكُن |
مهما أوصف شعوري عمر ما حد هيوصله أبدًا بسمع كتير كلمة "أنا فاهماكِ" "أناحاسة بيكِ" لكن من جوايا ببقى متأكدة إن مفيش حد هيوصله شعوري كامل، زي وجع القلب الي جوايا والخنقة زي ما يكون جبال الدنيا فوق قلبي كده، مش الإنسان الي بيختار شكله ولا هو الي بيختار تفاصيل حياته كل ما أفتكر كلامه وهو بيقول:" تسنيم أنا مش هقدر أكمل أنا آسف لكن النمش الي مالي وشك ده وانتِ برفضك لعملية التجميل أنا مش هقدر أكمل كده بصيلي كده عاجبك شكلك وهو مبقع بالمنظر ده" بنهار ألف مرة إزاي؟! هو أنا وحشة فعلا هو أنا متحبش زي كل البنات أنا جويا عالم أبيض جميل بفراشات أنا لسه طفلة بلعب وأجري في العالم بتاعي ده تفرحني كلمة وتموتني كلمة تانية هو أنا وحشة أوي كده ...
(مفوقتش غير بعد ما خبطت في شاب واقف معرفش أصلا أنا إيه الي جابني هنا برفع عيني لقيت عيني قابلت عينه لثانية اتنفضت عيوني كانت مليانة دموع أتخنقت أنا مبحبش حد يقرب مني)
=أنا.. أنا آسف يا آنسة مخدتش بالي
لقيت دموعي نزلت من غير ما احس
=طي... طيب حضرتك بتعيطي ليه دلوقتي أنا بعتذرلك تاني
(مشيت بسحب رجلي بالعافية ده زي الي إني اتكهربت كده ومش عارفة انطق)
روحت البيت انهرت عياط معرفش قعدت قد ايه ابكي افتكرت كلام خطيبي ونظراته افتكرته وهو بيخلع دبلته وبيسيبها ويمشي هو مشكلتي إن معنديش حد استند عليه لا أصحاب ولا أخوات حتى الشخص الوحيد الي قبلت وجوده جمبي حطمني ومشي فتحت المصحف وقرأت فيه معرفش قرأت قد إيه أنا قرأت فيه لحد ما نمت ده عالم الأمان بالنسبة لي..
نزلت تاني يوم أجيب شوية حاجات ناقصاني وأنا راجعة في نفس المكان لقيته واحد واقف يبتسم اتوترت حاولت أتجاهل لكن لقيت نفسي ببصله تاني لقيته ضحك (ده الي هو إيه ده فوقي يا تسنيم بدل ما أموتك ماشي ان شاء الله)
_يعني مش كفاية بكلم نفسي لا ده أنا برد عليها كمان
جبت رواية أقرأها بقالي زمان مقرأتش كان فيها وصف دقيق لأمير القصة
_يااه لو القصص دي حقيقة لو ينفع أعيش جوه الروايات والقصص ومطلعش بره الكتاب الكتب دي عالم أبيض جميل والواقع سيء بدرجة لا توصف نفسي أسمع كلام ماما وأفصل حياتي عن الروايات عشان متعبش بعد كده لكن أنا فعلا تعبانة..
قمت صليت ركعتين قيام الليل ولقيت نفسي بسجد ومنهارة عياط يارب عوضني عوض قلبي يارب قلبي بيتفطر من العياط واتفاجأت اني بدعي بيه أيوة الشاب الي كان بيبتسم انهارده معرفش إزاي خلصت صلاة ..
_عايزة ألطش لنفسي أنا غبية جدا يعني وبإذن الله هبطل هبل عشان كده مينفعش أنا مش عارفة والله أقول ايه على نفسي حد يدعي بحد ميعرفهوش أموت نفسي يلا أنام أرحم من العبط ده
صحيت تاني يوم لازم أظبط نفسي ورانا شغل مسكت كتبي ومذكراتي ورتبتها قلبت الأوضة وحطيت كل حاجة مكانها قررت أسيب كل حاجة ورايا أبدأ من جديد أحارب لوحدي من أول السكة
الباب خبطت ..
_اتفضلي يا ماما
=اي النشاط ده كله بحيث كده عايزة أقولك على حاجة
_قولي يا ست الكل
=في ضيوف جايين إنهارده عشانك
قمت اتنفضت
_اي..ايه
حسيت قلبي وجعني
=ادي نفسك فرصة تانية دول ناس محترمين أوي (مسكت إيدي) أوعديني إنك هتحاولي
بصيت ناحية المكتب
_ أيوة يا ماما أنا لازم أحاول لأ أنا لازم أخرج من الكآبة دي أنا موافقة أستقبلهم إنهاردة
= أهو كده أنتِ بنتي الي أعرفها باستني في خدي وخرجت
جه المعاد الجرس رن وأنا لسه في الأوضه بلبس فكرت في كلام خطيبي الأول بصيت لنفسي في المراية خوفت وبصراحة نفسي أخرج أقلهم خلاص أنا مش مستعدة
_ماما فتحت الباب يلا يا بنتي تعالي هما منتظرينك
=دخلت وقلبي بيدق بشكل فظييع معرفش ده خوف ولا توتر(أنا الي أستاهل أنا الي عاملة فيها شجاعة ويلا يا ماما ونييينييينيي)
_اتفضلي يا أم محمد أفرجك على النيش بتاعنا..
خرجوا سبونا لوحدنا
(أنا مالي كده هموت شكلي هموت بجد)
=أنا إسمي محمد دكتور صيدلي محافظ على صلاتي الحمد لله أهم حاجة عندي الصدق أهم حاجة إيه؟
رفعت راسي من الأرض
_إيه!!! ا..أنت قص..قصدي حضرتك
ضحك بصوت (لا ده أنا موت من زمان)
=مش مستنيكِ تقولي حاجة عن نفسك أنا أعرف عنك كل حاجة وهيبقى أمي الي بره دعيالي لو توافقي عليا يعني أقصد حضرتك وضحك
_انت بتتريق عليا!!
=لا والله أنا مقصدش هنتظر منك رد روحي يا شيخة ربنا يجعلك من نصيبي
ابتسمت ووشي احمر
=خلاص خلاص لتموتي مننا أنا مستعد لأي سؤال يعني لو حابة تسألي في أي حاجة
(انتِ غبية يا تسنيم إي يا ست الشجاعة ما تنطقيييي)
_إحم إييه(كلام الدنيا كله غاب عن بالي مكنش في بالي غير حاجة وحدة) ليه أنا؟
= بصي يا ستي من اليوم الي شوفتك فيه وأنا مش عارف أعيش بجد بشوفك في كل لحظة في حياتي كنت بدعي بيكِ ليل نهار في كل سجود تعرفي قلبي حاسس إنك هتوافقي أنا اتعشمت في ربنا وربنا يجبر خاطري بيكِ
_...
=هستنى ردك ..
ده إزاي ده هو إزاي كده معقول!!
لقيت نفسي وافقت عليه قلبي ارتاح كده ومعرفش إزاي زي ما يكون قلبي أطمن ومعرفش السبب لكن أنا متطمنة أجمل حاجة ممكن حد يحس بيها الإطمئنان وافقت هو صمم يتكتب الكتاب على طول ومعرفش دي كمان أنا وافقت عليها إزاي
بارك الله لكما وبارك عليكما وجمع بينكما فى خير
لقيت ايد شدتني فجأة همسلي
=مبارك عليا دخولك حياتي يا نيمو
(حياتي ونيمو هو اتهبل ولا إيه)
_محمد
=يا قلبه
_هو ممكن يعني أسألك سؤال معرفش ليه من ساعة ما جيت بيتنا وأنا نفس أسأله
=لا لا شوفي بقولك إيه أسئلة كتير مش عايز متدوشنيش من اولها
_انت امتى بتبقى جد عايزة أفهم
=خلاص قولي
_ إيه رأيك في وشي لألأ يع..يعنيي النمش..
= بصي يا ستي من اليوم الي شوفتك فيه كنتِ بتعيطي حسيت قد انتِ بريئة إزاي انتِ كده أنا مراقبك بقالي شهر من غير ما تاخدي بالك وانتِ ما شاء الله ولا هنا أصلا تعرفي كمان انتِ حلوة حلوة بشكل متتخيلهوش
_حتى بالنمش ده!!
=ده النمش ده هو الي محليكِ، تناثر النمش في وجهكِ كأنه حبات سكر ولكن ويا عجبي أيُحلى العسل بالسكرِ!
حسيت وشي سخن بقى نار من الكسوف (لا بص ده أنا ممكن ممكن أنا هعيط دلوقتي)
_تعرف أنا لقيت نفسي بدعي بيك حتى من غير ما أعرف اسمك أنا معرفش ليه وافقت لكن أنا لقيت نفسي مطمنة أنا اتطمنت لأول مرة كنت أحس إني مطمنة الإطمئنان بالنسبالي أهم من كل حاجة في الدنيا الي بيطمن بيعرف يحب ويعرف يفرح ويعرف يبقى سعيد في حياته
= يعرف إيه؟!
_يبقى سعيد في حياته
=لا لا الي قبلها
_يعرف يفرح
=لا برضو مش دي الي قبلها
_يووه مش فاكرة بقا
=انتِ جيتي عند دي وجالك فقدان ذاكرة مؤقت
_خف هزار بقا
=دي استجابات لدعواتي
لقد جئتِ استجابة لدعوة خصصت للدعاء بكِ💙
وكأن روحينا قد تآلف منذ زمن بعيد والآن آن للروح أن تسكن💙
"آلاءات"
تعليقات