 |
| جميلة في کُل تفاصيلها |
"جميلة في کُل تفاصيلها" بقلم الكاتبة حبيبه حاتم
قصة قصيرة
خلصنا كتب الكتاب ووالدتي طلبت إننا نخرج سوا أهو نتعرف علي بعض أكتر وخاصةً إنّا كنا ملتزمين بضوابط الخطوبه جداً وهي كانت متفهمه ده وفرحت جداً خصوصاً يوم الخطوبه لما خليت أمي هي اللي لبستها الشبكه خرجنا وروحنا مكان هادئ قدام البحر إحساس جميل لما تبقي قاعد في الهوا الحلو والبحر قدامك إحساس جميل كنت مركز مع البحر أوي وفوقت علي سؤالها وهي بتقول
هي: حبيت؟
مفهمتش قصدها إيه بالظبط خوفت تكون قصدها إني حبيت قبل كده سألتها
هو:قصدك إيه؟
هي:حبيت قبل كده كل إنسان لازم يكون في حياته حب أول وأنا عاوزه أعرف
هو:هتفرق معاكي
هي:أكيد هتفرق إنّا نبدأ حياتنا سوا بصدق مفيهاش كدب ومفيش حاجه مستخبيه علشان منجيش نندم في الأخر
هو:مش هتضايقي لو عرفتي
هي:بالعكس هفرح جداً إنك صارحتني
مكنتش عارف أقول لها وإلا إيه أنا من عادتي إني مش بحب أشارك حياتي وأحزاني وأسراري مع حد نظره عنيها وهي بتسألني كأنها في إمتحان ومستنيه النتيجه فإضطريت أقولها
هو:أيوه حبيت قبل كده
حسيت إنها هتعيط عنيها بتلمع كإنها بتحاول تحبس دموعها إنها تظهر
هي:علاقتكم بدأت إزاي
هو:أنا كنت شغال دكتور في مستشفي لأمراض القلب قبل ما أفتح العيادة بتاعتي شوفتها هناك وحبيتها من أول نظره
هي: كانت دكتوره
هو: لا مريضه كانت مريضه قلب كان جميلة أوي كانت في عز تعبها وحزنها بتضحك أنا نفسي كنت بحسدها علي الثبات النفسي اللي كانت فيه كانت عاقله أوي وناضجه كنت بديها العلاج وأقعد أتناقش معاها بفرح أوي بكلامها كانت بتقنعني بطريقتها بسهوله كنت زي المغيب بقتنع بكلامها
هي: متجوزتهاش ليه
حسيت إنها ماسكه دموعها بالعافيه وأني لو إتكلمت أكتر هتعيط بس لازم أتكلم مش هفضل ساكت وهي كمان اللي سألت
هو: كانت مريضه قلب ومحتاجه عمليه ضروري بس العمليه إتعملت متأخر تعرفي إني قلت لها إني بحبها وكان رد فعلها إنها إبتسمت ولما سألتها عن شعورها تجاهي قالت لي إنها مش هتفضل عايشه كتير هي مريضه وأني موقفش حياتي علشانها وقبل ما تدخل أوضه العمليات طلبت مني إني منسهاش وفعلا ماتت ومنستهاش لإني لو حاولت قلبي مش هينسي الحب اللي حبه ليها.
غصب عني عيوني دمعت وأنا بتكلم عنها مكنتش بس حبيبتي لا دي كانت البهجه اللي بتدخل قلبي الحب اللي بيجي فجاة وبيكون أول حب بيكون صعب إنه يتنسي بسهوله مقدرتش أتكلم عنها تاني لإني لو إتكلمت هضعف وهنار وأنا مش بحب أبان ضعيف شوفت الدموع بتتجمع في عنيها شكلها حلو أوي بس حزين علي قد ما كانت جميلة علي قد ما كانت حزينه حسيت إنها هتعيط بس أعمل إيه هي سألت وأنا كان لازم أجاوب
هي: أنا أسفه جدا
بتعتذر ليه مفيش أي سبب للإعتذار أنا اللي أسف لإني جرحتك وحسستك إنك ولا حاجه
هو: أنا اللي أسف إني حكيت أنا عارف إني زعلتك بس غصب عني أنتي سألتي وكان لازم أجاوبك كان لازم أقولك الحقيقه وأقولك إن قلبي متعلق بواحدة ميته أنا أسف إني زعلتك
هي: لا أنا اللي أسفه إني خليتك تفتح جروح الماضي الحاضر لسه مقفلهاش
كان لازم أقولها حاجه تفرحها أو تجبر بخاطرها هي كده إزاي غيرها كان رفض يكمل بعد ما يسمع اللي قلته
هو: تعرفي إنك جميلة أوي
شوفتها بتبتسم بخجل خدودها بقت حمرا زي الفراوله عيونها لمعت إبتسامتها زادت كإنها كانت مستنيه إني أقولها كده
هي: شكرا جدا
هو: هو في واحدة بتشكر جوزها
هي:ها
هو: تعرفي إني حسيت براحه لما إتكلمت معاكي أنتي ملاك فعلا جميلة أوي وأنتي مكسوفه بتبقي أجمل عيونك لما بتلمع في الشمس أنا حبيت الشمس لإنها بتخليني أشوف عنيكي الجميلة دي إبتسامتك وأنتي مكسوفه ولما بتكوني فرحانه يوم الخطوبه لما قلت لك إن والدتي هي اللي هتلبسك الشبكه شوفت إبتسامتك اللي كانت بتقولي أنتي فرحانه قد إيه بجد أنتي ملاك وجميلة أوي لدرجه إني مش قادر أوصف أنتي جميلة قد إيه
حسيت إن عنيها بتضحك وقلبها بيضحك مش عارف قلت الكلام ده إزاي كل اللي أعرفه إن قلبي عاوز يقولها كده أو بمعني أصح قلبي بيوصفها بيوصف اللي حاسس بيه
هي: تسلم لي ربنا يديمك ليا
كان لازم أقولها كده لازم أقولها هنبدأ حياتنا مع بعض فلازم نبدأها صح هي تستاهل تستاهل أغير من نفسي علشانها تستاهل أدي قلبي فرصه إنه يحبها
مسكت إيديها لإحظت إن إيديها تلج واضح إنها مكسوفه أوي حاولت تسحب إيديها بس أنا رفضت مسكت إيديها أوي
هو: علي فكره إحنا خلاص كتبنا الكتاب يعني من حقي أمسك إيدك.
لأحظت إن خجلها زاد أكتر
إبتسمت لها وكان لازم أقولها هنسي الماضي علشانها هبدأ من جديد معاها هقفل جروح قلبي وأقفل ذكريات الماضي علشانها هي لإنها تستاهل بجد
هو: أوعدك إني هحاول أنسي الماضي وهحاول أفتح قلبي ليكي وأحبك
إبتسمت كإنها في بحر وبتغرق ولقت مركب تنقذها
هي: أوعدك إني هعمل المستحيل وأخليه تحبني وأكون معاك دايما
هي كده إزاي قويه وضعيفه في نفس الوقت بتبقي مكسورة وبتبتسم طفله في كل تفاصيلها خجلها وإبتسامتها هي تستاهل إني أحاول علشانها هي تستاهل إنها تتحب
وعـجزت الـحُروف عـن وصـفِها فلـم تقدر الكلمات أن تُلبيها حقُها.
تستحق المُعافرة لأصل إلي قلبها تستحق أن أستثني الجميع وأختارُها.
جميلة في کُل تفاصيلها في سعادتها وحُزنها حالما رأيت إبتسامتها دق قلبي لأجلها وأعلن أنهُ وقع أسير حُبِهـا
تعليقات