هي الفكرة في إن في منحنى قدامك، المنحنى ده بيبقى طالع لفوق في أوله، وبعدين ينزل لتحت بالتدريج أوي، وبعدين يترفع لفوق تاني.
فهمت حاجة؟ هو ده المنخفض.
كل حاجة بنعملها في حياتنا بنبدأ فيها مبسوطين ومتحمسين إننا هنخلصها وهنولع الدنيا وبتاع.
لما بتفتح كتاب بتقرأ فيه 20 صفحة، وتبطل..
لما تدخل علاقة جديدة في أولها بتتكلموا كتير، وبعدين الصمت يعُمّ، وكل حاجة تهدى تمامًا بينكم، وتكون رتيبة..
لما تشتري حاجة جديدة بتهتم بيها أوي، أول أسبوع بس، وبعدين بتكون مهمل..
لما تبدأ سنة جديدة بتتحمس للمذاكرة جدًا، يومين بس..
لما تشتغل جديد بتخلص شغلك قبل الديدلاين، في أول يومين..
كل اللي فات ده وإنت في بداية الطريق، في بداية المنحنى وواقف فوق، نفس مكانك في الصورة دي، كل حماسك وسعادتك، وطاقتك في ذروتها، وهتقع كل ما تتحرك لقدام.
المنخفض هو الوقت اللي هتبدأ تغرق فيه، هتشوف صعوبة كل شيء على حقيقته، والتعب والإرهاق والملل.
واللي عليك وقتها إنك تصبر وتكمل بنفس فاعليتك.
ليه تنهي علاقتك بالشخص اللي بتحبه لمجرد إنك حسيت برتابة في فترة ما، بعدين تقعد زي الغبي تندم بعدها.
لما تجرب تتعلم كورس وتبطل، تقرأ كتاب وتقف، كل دي الأوقات اللي بتكون فيها دخلت في المنخفض، في نص الطريق.
إيه اللي بيحصل بعد الوقت ده؟
المنخفض بتعبه كله بيزول، وبتبقى في المنحنى من العالي تاني، اللي هو آخر الطريق اللي إنت شايفه ده.
المنخفض ده هو الفرق الحقيقي ما بين "المبتدئ" وبين "الخبير".
فتخيل بقى لو إنت متحملتش، تفضل كل كورس تدخله تنقل منه، ومش قادر تنتهي منه وتحصل على شهادتك.
المنخفض يكمن في إنك تتحمل شوية الوقت ده، في أي حاجة في حياتك، لحد ما توصل للنهاية الحقيقية.
شايف آخر الطريق؟ هو ده المنخفض.
تعليقات