كتبت؟
لسه بتكتب؟!
طب ما تيجي ندردش شوية، ونتكلم..
إزاي الناس هتتعرف على محتواك اللي بتكتبه، إزاي هتسوقله، إزاي هتكون انفلونسر كتابة؟!
مبدئيًا كدا..
أنا محمود مصيلحي،،
كاتب وليا روايتين، إحدهن منشورة وموجودة بشكل ورقي في المكتبات وpdf (رواية كانديلا) والتانية (قميصُ يوسف) واللي هتتنشر في معرض القاهرة للكتاب يناير 2021، ومدير تسويق سابق لأحد دور النشر وأخيرًا وليس أخرًا 19 سنة..
طب ما تيجي ندخل في موضوعنا؟
بُص يا عزيزي، مبدأيًا كدا ما ينفعش تكتفي أبدًا بقوة محتواك، بالعكس إنتَ من وقت ما تعرف إن ربنا أعطاك الموهبة فإنتَ مُطالب بإنك تديها حقها وتظهرها للناس..
شايف الناس اللي كتاباتها عامية دي وصفر محتوى وبتبيع.. طب شايف الناس اللي مسخره محتواها لحاجات سيئة وبيبقى لها آثر اجتماعي، ولعل أكبر آثر من ده هو الإلحاد، مُتخيل الموضوع وصل لفين؟
إنتَ مُحمل بهبة من ربنا، هل الهبة اللي معاك دي هتكون أعظم من رسالة سيدنا مُحمد أو عيسى!
لو طريقتك في التعامل صح (في إنك تعتمد على قوة محتواك بس)، يبقى سيدنا مُحمد كان هيقول لنفسه أنا مُحمل بأعظم رسالة، أعظم من أي حد، ولذلك مش هبذل مجهود لنشرها بين الناس، أو إني أعرف الناس بيها!
تخيل كان هيحصل إيه!
فأنتَ كمان عندك هبة، وهي الكتابة، إنتَ مسؤول، وإنتَ بإيدك فُرصة جميلة.
يا عم حتى لو إنتَ مش صاحب رسالة، ويا دوب بتحب تُحبك حدوتة وتكتبها، فا على الأقل هتساهم في الحد من الكُتب التانية، لما تتعرف، وتلاقي قارىء فَضل كتابك، عن كتاب كله أفكار إلحادية (كاتبها بيسيبها وما بيتطرقش لحلها في نهاية عمله، بيسيبك لوحدك لدماغك).
طب تمام، دلوقتي عرفت الأهمية، أعمل إيه؟!
أول حاجة ما تبصش لغيرك وتقول أنا أحسن وهو معروف أكتر، لأنك صدقني هتتعب وهتضيع وقت كان ممكن تستغله لنجاحك..
علشان تسوق لمحتواك يا عزيزي، عندك طريقتين، والإتنين مع بعض، بيعملوا نتيجة عظيمة وسريعة:
الطريقة الغير مدفوعة:
بتبدء تعمل جرد بسيط كده، وتجمع الجروبات الثقافية، قدر المستطاع، وتصنفها، ده بيقبل قصص.. ده بيقبل خواطر.. ده بيسمح بالدعاية وهكذا.. (مش هينفع أحط أي لينك جروب، دور بنفسك واجتهد، وصدقني هتبقى مُستمتع وحاسس بإنجاز شخصي)
من ثم هتبدء تنشر عليهم، بالتوازي مع نشرك على الأكونت الشخصي، وفي كل مرة تسيب كومنت تحت منشورك في الجروبات دي وتقول مثلًا إن باقي القصص هتلاقوه على الهاشتاج ده عندي على الأكونت، أو على اللينكات دي، حاول ترد على كل الناس حتى لو شخص واحد اللي عملك كومنت، رد بكل ود عادي، ما تبقاش مُزيف، هتفضل تنشر بالشكل ده كتير، وهتيأس أكتر طول ما بتبص للنتيجة، كمل سعي، هتلاقي مرة 3 لايكات ومرة مفيش.. ومرة تلاقي ألف!
كمان في صفحات بتقدم دعم محتوى بدون مقابل، ولو كتاباتك أو موهبتك عمومًا كرسم أو غيره تستاهل هينشروها، ولعل أشهر الصفحات دي وأفضلهم من حيث مساعدة الناس والمواهب الشابة بجد، هي صفحة اسمها "فُلك" (بضم الفاء).
واستمر، وخلي عندك يقين إن أكيد ربنا مش هيخذل يقينك فيه.
الطريقة المدفوعة:
بتحوش جنيه على جنيه حرفيًا، وكل آخر شهر بتبص معاك كام، وبتبعت للصفحات الكبيرة اللي بتنشر اعلانات وكتابات، وبيبقى مثلًا الشير بخمسين أو 100 جنيه، وفي منهم اللي بيبقى عامل عروض، ادخل على أي بيدج واسأل عن باكيدج الإعلانات، الموضوع بيفرق جدًا، وهتكون نتيجته سريعة معاك.
لو إنتَ عايز تروج لعملك اللي فعلًا هيتنشر؟
بتستخدم الطريقة المدفوعة، بإنهم يعملولك شير لاقتباسات أو برومو العمل، وبالنسبة للطريقة الغير مدفوعة هتستخدمها، بس بشكل تاني، وهي إنك هتجمع تيم من أقرب الناس ليك، وتبدء توزع عليهم اقتباسات ينشروها في الجروبات الثقافية، بجدول تعمله، بحيث تعمل انتشار عظيم ليك.
ممكن كمان تعمل بيدج ليك وتروج من خلال الإعلانات الممولة، بس ما نصحكش بده في بدايتك، لأسباب يطول شرحها.
حاجات لازم تفهمها:
الـ"Follow" العادي نتيجته بقت ضئيلة جدًا، فمثلًا إنت علشان تشوف البوستات بتاعتي اللي جاية على الجروب هنا، مش دايمًا هتشوفها، هيضيع منك أغلبها، عكس الـ"see first" اللي بتخلي نسبة إنك تشوف البوست تكاد تكون 100٪، فبعد ما بتعملها بتوصلك كل حاجة، وعلشان كده لازم دايمًا سعيك يبقى إن اللي هيقرألك يعملك (See first) مش مجرد متابعة، وحاول ما تطلبش ده وتبقى رخم، ممكن توصلها بشكل غير مُباشر، زي ما عملت معاك كده دلوقتي.
كمان البرومو مُفيد جدًا، ولازم تخلي حد متخصص يعملهولك علشان بتفرق..
بعد ما روايتك تتنشر، صور اقتباساتها واعملها ايفكتات من أي برنامج تليفون، وانشرها، هتفيدك.
ما تنساش إن التدقيق اللغوي قبل تقديم العمل هيفرق معاك.
مؤخرًا بدء يكون تطبيق الأنستا أفضل بكتير من حيث نسبة الوصول من الفيس بوك، فاهتمامك بالأنستا وإنك تصرف عليه، هيكون استثمار جيد، وممكن يطلعلك منه عائد في الآخر، ولكن الموضوع هنا يطول شرحه وفني أكتر، بعيدًا عن الكتابة.
بالمناسبة، مش شرط خالص إني أكون انتظمت وعملت كل اللي قولتهولك، دي حاجات اتعلمتها، وكنت بدأت أنجح وأحقق نتايج منها، لحد ما جت ظروف ما وقفتني كُليًا عن الكتابة وبعدتني عن السوشيال أصلًا، غير إن اهتمامي الأكبر كان بشغلي.
إزاي تنمي محتواك؟ إيه هي المحظورات اللي ما ينفعش نقول عليها كتابة أو نصنف إن هي ليها علاقة بالأدب أصلًا، وإيه الفرق بين الكاتب والأديب، وحاجات فنية أكتر.. ممكن نتكلم عليها لو حابين.♥️
تعليقات