🌹 تشيز كيك مانجه طعمها وهم 😋🌹
مبدأيا الشكل اللى انتوا شايفينه ده اتنين تشيز كيك جوه بعض فالطريقه طويله بس سهله جدا
🌹المكونات🌹
🌹2 باكت بسكوت داناش او اى نوع بسكوت شاى بتحبوه
🌹 كيلو جبنه كيرى كريمى
🌹 2 كريمه خفق حلويات( كريمه لبانى 250 جم
🌹6 ملاعق كبيره سكر بودر
🌹 كيلو مانجه متقطعه كيلو بعد التقطيع
🌹 نص كوب سكر
🌹جيلاتين
🌹 باكت جيلى مانجه
🌹كريم شانتيه التزين
🌹صوص المانجه🌹
هناخد نصف كيلو مانجه متقطعه ونضيف عليها ربع كوب سكر ونحطها على النار هتلاقى المانجه نزلت مايتها نهدى النار ونقلب كويس لحد المانجه تتشرب كل العصاره بتاعتها ونضيف عليها ملعقتين نشا مدوبين فى نص كوب ماء ونضيف شويه بشويه لحد منحصل على قوام تقيل بالهاند بليندر أو في الخلاط نضرب الصوص ده لحد منحصل على قوام كريمى 👌
🌹طبقه البسكوت🌹
هناخد البسكوت ونحطه فى الكبه يطحن كويس نضيف عليه زبده لحد ميبقي زى الرمل المبلول نمسكه بادينا ونضغط عليه يبقي زى الكوره نيجى نفرطه تلاقيه بيتفرط تانى زى الرمل منزودش الزبده علشان ميبقاش معجن
🌹 الطريقة🌹
🧑🍳🧑🍳🧑🍳🧑🍳🧑🍳
هناخد نص الكميه لعمل تشيز كيك اللى جوه اللى لونها ابيض وبينها صوص المانجا وقطع المانجا
هنخفق علبه كريمه خفق لنحصل على قوام كريمي ومنبالغش فى الخفق علشان الكريمه متفصلش بعدين نضيف نص كيلو جبنه كريمى على الكريمه و3 ملاعق كبيرة سكر بودر والسكر حسب رغبتك نخلط المكونات على بعض وبعدين نضيف ليهم ملعقتين كبار جيلاتين مدوبين مسبقا فى مايه ساخنه نقلب الخليط نقسم الخليط ده لنصفين متساوين ونحضر صينيه مقاس12 أو أصغر صينيه عندك ونحط فيها كليننج فيلم استرتش أو كيس تلاجه ونفتحه ونبطن بيه الصينيه بحيس اطراف الكيس تبقي برا الصينيه زى مبنعمل الجلاش هناخد جزء من الخليط ونحطه فى الصينيه وندخله الديب فريزر يتماسك نخرجه ونحط فوقه صوص مانجه ونضيف على صوص المانجه ايضا ملعقتين جيلاتين مدوبين مسبقا فى مايه ساخنه وتدخلها الديب فريزر يتماسك نخرجها نضيف قطع مانجه ونحط نصف الخليط الثانى فوق الصوص والمانجه المتقطعه وندخلها الديب فريزر تتماسك ده التشيز كيك الصغيره اللى جوه بيكون لونها طبقه تشيز لونها ابيض طبقه مانجه لونها اورنج وقطع مانجه وطبقه تشيز ابيض دى اول واحده 👌👌نحطها فى الثلاجه ونحضر التشيز الكبيره
🌹الطريقه 🌹
🧑🍳🧑🍳🧑🍳🧑🍳
نفس طريقه
هنخفق علبه كريمه خفق لنحصل على قوام كريمي ومنبالغش فى الخفق علشان الكريمه متفصلش بعدين نضيف نص كيلو جبنه كريمى على الكريمه و3 ملاعق سكر بودر والسكر حسب رغبتك نخلط المكونات علب بعض وبعدين نضيف ليهم ملعقتين كبار جيلاتين مدوبين مسبقا فى مايه ساخنه نقلب الخليط ونضيف على الخليط ده صوص مانجه علشان لونه يبقي مدى على اورنج هادئ
نحضر صينيه مقاس 16 اكبر وبنفس الطريقة هنحط فيها استرتش كليننج فيلم أو كيس ثلاجه كبير ونفتحه ونحطه جوه الصينيه وباقى اطراف الكيس خارجه ونبطن الصينيه بورقه زبده فوق الكيس ونحط البسكوت المطحون بالزبده ونضغط عليه كويس وبعدين نضيف نصف خليط التشيز فوق البسكوت وتدخله الديب فريزر يتماسك ونخرجه وهنا بقي هنحط التشيز كيك الصغيره فاكرنها هنحطها ازاى هقولك هنشيل اطرف الكيس الخارجيه ونطلع التشيز ونحطها على الرخامه ونفصل الكيس من على جوانب التشيز هتطلع بسهوله جدا ناخد التشيز على ايدينا ونحطها فى وسط الصينيه الكبيره هنلاحظ أن فى فراغ بين التشيز الصغيره وجوانب الصنيه الكبيره وده المطلوب علشان هنحط اخر جزء من التشيز فوق التشيز الصغيره وهينزل فى الجوانب وهيملاها ندخلها الديب فريزر تتماسك ونخرجها نكون مجهزين جيلى مانجه ونحطه فوق التشيز وندخلها الديب فريزر تخرج نخرجها من الصينيه ونزينها بقطع مانجه وروزيتات كريم شانتيه ونعناع اخضر يكسر اللون وبالف هنا 🥰
تعليقات